Salcedo misugyot malakip brgy tanod paghatag og insentibo

SI konsehal Enrico Salcedo, chairman sa komite sa environment and natural resources, misugyot nga unta lakip sa hatagan og insentibo ang mga barangay tanod kinsa dako usab og pag-abag sa Roads and Traffic Administration (RTA) ug sa kapolisan isip mga force multipliers.

Kini ang reaksyon ni Salcedo sa special report ni konsehal Roger Abaday kalabot sa pagpatuman sa sharing scheme sa multa sa kalapasan sa balaod trapiko.

Matod ni Salcedo nga naana may sweldo ang mga RTA ug kun mohatag man gani sa insentibo didto nalang sa mga volunteers nga gideputize sama sa barangay tanod nga gadawat lang sa gamay nga honorarium apan dako og natabang sa kadalanan ilabina sa mga espisyal nga okasyon.

Dugang sa konsehal nga mahimo man nga makapatuman ang RTA sa mga balaod sa trapiko bisan walay insentibo.

Dili ako supak pero kun mohatag man gani ta og insentibo tanan nga volunteers ilabina ang mga barangay tanod unta makonsiderar nga mahatagan, panapos ni konsehal Enrico Salcedo.