Safety seal giluwatan alang sa carnival dihas Ketkai

LUWAS alang sa paggamit sa publiko ang Mary Rose Carnival nga nahimutang dinha sa Limketkai compound.

Kini ang nadawat nga kompirmasyon sa konseho sa syudad ubos ni Bise Mayor Bebot Rodriguez gikan sa City Engineer’s Office (CEO) human gipahigayon ang pagsusi sa komite sa games and amusement ni Konsehal Roger Abaday sa milabayng semana.

Mahinumduman nga ang komite uban sa lain laing ahensya sa gobyerno mipahigayon sa maong pagsusi sa tinguha nga masegurong luwas ang publiko nga mosakay sa gitanyag nga mga rides ug usab nga nasunod ang gihan-ay nga health protocols kontra Covid 19.

Hinuon, girekomendar sa CEO ang makanunayong pagsusi ug pagpahigayon og bolt tightening ingon man pag-lubricate sa mga makina sa dili pa ablihan sa publiko matag adlaw.

Dugang girekomendar nga ang mga warning ug precautionary signages sama sa prohibitions o’ exemptions alang sa mga buntis, adunay heart o’ health conditions, mga nakainom og ilimnong makahubog ug mga menor de edad nga ubos sa 10 anyos kinahanglang mabutang sa hayag nga dapit aron daling makita sa publiko. (SP/JNortiza)