RTA gitahasan pag-imbentaryo sa mga PUs dinhi sa syudad

GITAHASAN ni Konsehal Romeo Calizo, Chairman sa Komite sa Public Utilities, Roads and Traffic Management, ang Roads and Traffic Administration (RTA) sa pagpahigayon og imbentaryo sa tanang pampasaherong sakyanan dinhi sa syudad.

Kini human ang Taxsee Philippines Inc. sa tigom sa komite sa miaging semana mihangyo ug mipresentar sa ilang laraw nga mag-operate og Transport Service Vehicle Services (TNVS) sa tinguha nga ma-promote ang kompetisyon ingon man dugang mapalambo  ang transportasyon sa syudad.

Ang TPI usa ka kompanya nga naggamit sa bag-ong teknolihiya sa pag-book og mga biyaheng cargo transportation ug uban pa.

Sumala pa nga ang TNVS susama lang usab sa Grab Philippines nga ang taxi o pribadong sakyanan  mahimong magpalista  kanila pinaagi sa ilang  online apps aron  makakuha og pasahero.

Sa iyang bahin, si Konsehal Roger Abaday mibutyag  nga  angayan matun-an kini tungod  kay nagkadaghan na ang mga sakyanan dinhi sa syudad ug angayan lang nga maregulate kini labina nga naghuot na gayud ang dagan sa  trapiko.

Niini, gimandoan ni Calizo ang RTA sa pagpaghigayon sa imbentaryo ug  pagsumite sa datos alang sa maong  katuyuan.