RPT share sa kabarangayan gihingusgang mahatag na

HUGOT nga gihangyo sa pipila ka sakop sa konseho ang buhatan sa City Accounting sa City Hall alang pagrelease sa pahat sa kabarangayan sa ilang Real Property Tax .

Kini ang aksyon sa komite sa barangay affairs ni Konsehal Yan Lam Lim ug komite sa finance, budget and appropriations ni Konsehal Edna Dahino human gituki ang special report ni Konsehal Eric Salcedo mahitungod sa reklamo sa pipila ka barangay nga hangtod sa kasamtangan wala makadawat sa pahat sa ilang Real Property Tax kon RPT sa taas nga panahon.

Sumala sa representante sa buhatan sa City Accounting Office, ang hinundan niini tungod adunay mga barangay nga wala mag-comply sa ilang mga reporting gawas nga adunay pay mga sayop sa ilang gaipasa.

Si Konsehal Lim mibutyag nga dugay na kini nga mga reklamo sa kabarangayan apan unta kadtong mga nakasomite ug naka comply sa gikinahalang rekisitos angayan nga i release ang ilang pahat aron dili makadalahig sa uban.

Sa iyang bahin, si Konsehal Eric Salcedo mibutyag nga angayan man gayud kanang i-release kay mandatory obligation kini sa syudad ngadto sa kabarangayan labina dako kini og ikatabang aron matunol ang serbisyo ngadto sa katawhan.

Nunot niini, gipanawagan sa duha ka komite ngadto sa hintungdang buhatan ang hinanaling pagrelease sa RPT share sa mga barangays nga wala pa makadawat.