Resolusyon naghangyo sa LWUA pagrespeto sa opinion sa DOJ giuyonan

GIUYONAN sa mayoriyang sakop sa konseho sa syudad atol sa sesyon niadtong Lunes nga gidumala ni Presiding Officer Protempore Konsehal Romeo Calizo ang resolusyon nga naghangyo sa Local Water Utilities Administration (LWUA) nga respetohon o sundon ang gipagawas nga legal  opinion sa Department of Justice (DOJ) kabahin sa legalidad  pagtudlo sa LWUA sa interim manager ug interim board of directors sa Cagayan de Oro Water District (COWD).

Sumala ni Konsehal James Judith nga gitataw sa DOJ nga wala sa mandato ug walay kapasikaran basi sa probisyon sa PD 198  ang pag-interbinar sa LWUA  pinaagi sa pagtudlo sa internal general manager  ug interim board of directors sa COWD nga maoy nakapasamot sa kasamok sa maong buhatan tungod sa internal management squabble.

Niini malaumon si Konsehal Judith nga pinaagi sa maong legal opinion sa Department of Justice masunod sa LWUA ang maong mandato sa katuyoan sa pagtubag  og solusyon sa kasamtangang problema sa Cagayan de Oro Water District.