Renewal paglukat og biz permits sa kamerkadohan gilugwayan

Gilugwayan sa konseho sa syudad ubos ni Bise Mayor Bebot Rodriguez ang deadline sa panahon pagrenew sa mga business permits ug licenses dinha sa publikong kamerkadohan sa dakbayan gikan sa Pebrero 28, 2023 ngadto sa Marso 31, 2023.

Kini agig tubag sa hangyo sa mga mamaligyaay sa merkado sa Carmen ug Cogon nga malugwayan ang deadline tungod kay padayon pa nilang nasinati ang kapit-os sa ilang kinitaan gumikan sa nasinating pandemya dala sa Covid-19. Ang maong lakang paborableng girekomendar sa buhatan ni Mayor Klarex Uy ug sa City Economic Enterprises and Business Development Administration human nakita nga naglisod pa pag-apas sa ilang mga balayronon ang mga mamaligyaay sa kamerkadohan.

Niini, si Konsehal Ian Mark Nacaya, chairman sa komite sa economic enterprises, malaumon nga sa gihatag nga lugway magahom na sa mga mamaligyaay ang ilang balayronon ngadto sa lokal nga kagamahanan.

Ang hinay hinay nga pagbalik sa ekonomiya maghatag sa kahigayon nga matagamtaman sa mga market vendors ang pag-usbong usab sa ilang kinitaan, pamahayag ni Nacaya.