Relokasyon sa mga molopyo sa Pag-asa Bolonsori gihingusgan ni Cabanlas

SUPORTADO ni Konsehal Edgar Cabanlas, chairman sa komite sa urban and rural poor and housing development, ang resolosyon sa barangay Camaman-an nga naghangyong malakip sa mga benepisaryo sa relocation program sa gobyerno lokal ang mga molopyo sa Sitio Pag-asa Bolonsori, Camaman-an.

Atol sa milabayng tigom sa komite gitin-aw ni Cabanlas nga kanunay malakip sa relocation program ang mga residente sa dapit tungod kay ana-a kini nanimuyo sa gikonsidera nga high risk area nga delikado sa padahili sa yuta panahon sa ting-ulan.

Niini, gitahasan ni Konsehal Cabanlas ang mga kawani sa City Housing and Urban Development Department (CHUDD) nga mohimo og socio economic survey sa 67 ka pamilya nga naapektohan aron mapahilona kini sa labing dali nga panahon. (SP/MLRapanot)