Relocation program sa syudad nagpadayon – Cabanlas

GISUGYOT ni Konsehal Edgar Cabanlas, chairman sa komite sa Urban and Rural Poor and Housing Development, ang buhatan sa City Housing and Urban Development Department (CHUDD) ni Engr. Ermin Stan Pimentel nga tun-an ang hangyo sa usa ka

biktima sa demolisyon sa Barangay Lapasan nga maka-avail sa relocation program sa syudad.

Sumala ni Cabanlas nga bisan nag-atubang sa pandemya dili pasabot nga mahunong ang programa sa goberno lokal ilabi na niining pagpanghatag sa lote ug balay alang sa mga kabus nga katawhan sa dakbayan.

Mahinumdoman nga atol sa tigom sa komite niadtong milabay’ng semana, gikonsidera sa komite ang hangyo.

Nunot niini, gihangyo ni Konsehal Cabanlas ang maong buhatan nga kon mopasa sa mga gabayan nga gisitar sa programa matabangan kining maka-avail sa relocation program sa syudad.

Ang maong hangyo giduso ni Konsehal Cabanlas sa CHUDD alang sa tukmang aksyon ug rekomendasyon.