Reklamo sa residente diha dapit Gaston Park, giaksyonan ni Calizo

GISUGYOT ni Konsehal Romeo Calizo, chairman sa komite sa public utilities sa Konseho, ngadto sa Buhatan sa Administrador ang pagduso  sa  ilang rekomendasyon  bahin sa pagdumala  sa mga  sidewalk vendors diha sa Rizal Street duol sa Gaston Park.

Kini agig tubag sa reklamo  ni  Mary Jadiniano Malate kinsa nagrepresentar  sa ilang pamilya  ug uban pang residente  kabahin  sa presensya  sa mga  vendors nga nahimutang  dool sa ilang panimalay.

Sumala ni Malate nga dili sila supak sa  pagpamaligya sa mga vendors tungod kay panginabuhian kini apan buot  nila nga  maplastar sila tungod  kay gawas nga makadisturbo sa  pagparking sa ilang mga sakyanan, nagkinahanglan usab og tukmang sanitasyon  ang dapit tungod kay adunay  pipila nga kinamoton lang ang pagpreparar sa  ilang ginabaligya.

Gipasabot  ni Calizo nga kinahanglan nga mahatagan kini sa igong pagtagad tungod kay kon  dili regulated ang mga gimbuhaton sa mga vendors apektado  ang nagreklamo gawas nga maapektuhan usab ang dagan sa trapiko sa dapit.

Niini, gihangyo ni Konsehal Calizo ang buhatan sa administrador  kinsa mao ang overseer sa kinatibuk-an sa kagamhanan  sa paghatag sa ilang rekomendasyon  aron kini masolusyunan tungod kay kon pagsagdan magkadako kini nga  problema. (JRGalano/SP)