Reklamo sa kasaba gikan sa bars, susamang establisamento gilantaw’ng masolusyonan

Hayan maminusan na ang reklamo batok sa kasaba gikan sa mga establisamento nga gapatukar og mga sonata ug adunay live band ilabina panahon sa kagabhion.

Kini human giuyunan sa komite sa public order and safety sa milabayng tigom nga gidumala ni Konsehal Romeo Calizo ang gidusong rekomendasyon sa Regulatory and Compliance Board (RCB) nga mag-amendar sa Ordinance No. 4373 series of 1994 nga nagdili sa pagpatukar sa mga juke box, radio, stereo, karaoke ug ubang susamang instrumento dinha sa mga bars, beerhouses, sing along, restaurants, hotels, motels ug uban pa gikan sa alas 12 sa tungang gabii ngadto sa alas 5 sa sayong kabuntagon.

Gitumbok sa maong balaodnon kadtong mga nag-operate dinha sa open space o’ dili sound proofed ang mga establisamento. Sa maong amendatory ordinance, ang mga establisamento gimandoan nga hinayan ang kakusgon sa pagpatukar sa sonata gikan sa alas 10:00 sa gabii paingon sa alas 7:00 sa buntag aron dili makadistubo sa katawhan diha sa ilang pagpahulay. Ang maong aksyon tubag sa mga reklamo nga nadawat sa konseho gikan sa mga residente nga nanimuyo duol sa maong mga establisamento.

Si Konsehal Calizo mipasabot nga dili supak ang komite sa operasyon apan gusto lang kini nga maregulate aron dili makatugaw sa kadaghanan. Sa sugyot nga kabag-ohan, imando nga hinayan ang gikusgon sa sonata gikan sa alas 10:00 sa gabii paingon sa alas 7:00 sa buntag gikan sa adlawng Dominggo paingon sa Huwebes samtang gikan sa alas 11:00 sa gabii ngadto sa alas 7:00 sa buntag sa adlawng Biernes ug Sabado ug gitataw nga dili na mahimong magpatukar ang mga live band sa maong mga oras.

Sa laing bahin diha sa residential area, imando usab ang pagpahinay sa mga sonata gikan alas 10:00 sa gabii paingon sa alas 7:00 sa buntag gikan sa adlawng Domingo paingon sa Sabado samtang ang mga party venues, convention center, religious gathering ug susamang kalihukan mandoan sa pagpahinay sa gikusgon sa sonata gikan sa alas 11:00 sa gabii ngadto sa alas 7:00 sa buntag gikan sa adlawng Dominggo ngadto sa Sabado. Niini, ang mga representante sa mga bars ug susamang establisamento mihatag sa ilang pag-uyon ug mipasalig sa pagtuman niini.