Reklamo sa kasaba dihas Pueblo de Oro konsiderahon sa Komite ni Calizo

KONSIDERAHON sa Komite sa Public Order and Safety ubos ni Konsehal Romeo Calizo atol sa ilang tigom karong adlawa dihas hawanan sa konseho ang sulat ni Mr. Chrysler Acebu, bise presidente ug general manager sa Mindanao Pueblo de Oro Development Corporation.

Sa iyang sulat sa komite, giindorsar ni Acebu ang hangyo sa Homeowners Association of Pueblo Golf Estate kinsa nagpatabang nga masolusyonan ang kasaba diha dapit sa Masterson Avenue panahon sa kagabhion gikan sa alas 12:00 sa tungang gabi-i paingon sa alas 5:00 sa sayong kabuntagon nga nakadisturbo sa ilang pagpahulay.

Mao’y gitumbok sa maong reklamo ang kasaba sa mga loudspeaker nga gigamit sa mga fish vendors ingon man ang kasaba sa serbato gikan sa mga trucks ug shuttle bus nga gabyahian sa maong dapit.

Gidapit sa komite pagtambong sa tigom aron paghatag sa ilang panahom ug opinyon sila si Mr. Acebu, Meggie May Espina, director manager sa Pueblo Golf Estate, City Administrator Atty. Roy Hilario Raagas, City Legal Officer Atty. Kenneth Tamala, Atty. Jose Edgardo Uy, chairperson sa Regulatory Compliance Board (RCB), P/Col. Salvador Radam, city police director sa Cagayan de Oro City Police Office (COCPO), ug Engr. Nonito Oclarit sa Roads and Traffic Administration.