Reklamo sa aplikante sa quarry permit gipatun-an sa Mining Board

Sa tinguha nga daling maresolbar ang isyo kalabot sa usa ka aplikante sa sand and gravel permit alang sa iyang quarry operation, ang komite sa environment ubos ni Konsehal Roger Abaday miduso niini ngadto sa City Mining and Regulatory Board alang sa dugang pagtuki ug rekomen-dasyon.

Mahinum-duman nga sa tigom komite sa miaging semana, si City Local Environment and Natural Resources Officer Armen Cuenca mipasabot nga wala pa nila ma indorsar ang aplikasyon sa aplikante ngadto sa board tungod kay aduna pa kini kakulangon sa iyang rekisitos sama pagsumite og consent gikan sa tag-iya sa lote nga maigo sa iyang operations.

Gipasabot ni Cuenca nga ang mag-aprobar sa aplikasyon mao man ang CMRB ug usa sa rekisitos niini mao ang consent sa tag-iya sa lote nga maigo tungod kay ang iyang easement nga gigamit nilang access road nawala naman tungod kay naapil nilag extract hinungdan nga nakasulod na kini sa laing property, maong gikinahanglan niini ang consent sa tag-iya.

Sa iyang bahin, si Konsehal Abaday malaumon nga masulbad kini ug misugyot nga sundon lang ang tukmang procedures alang sa maong katuyuan.