Reklamo batok pipila ka opisyal sa tuloka brgy hisgutan sa Kom sa Blue Ribbon

TUKION sa tigom ugmang adlawa sa komite sa ethics and blue ribbon ni Konsehal Edgar Cabanlas ang reklamo nga gipasaka batok sa pipila ka mga opisyal sa barangay dinhi sa syudad.

Lakip niini mao ang sumbong batok sa kapitan sa Barangay 26 alang sa administrative adjudication.

Tukion usab ang sumbong batok sa kapitan sa barangay Mambuaya tungod sa matod pa paghimo sa mga lakang taliwala nga wala kini’y gahum ug sukwahi sa probisyon sa RA 7160 kon Local Government Code ug sumbong batok sa kapitan sa Balulang alang sa kasong usurpation of official function, abuse of power ug kalapasan sa probisyon sa Graft and Corrupt Practices Act.

Subling hisgutan sa komite ang reklamo nga gipasaka ni kapitan Diosdado Wabe batok sa iyang kagawad sa Barangay 31 alang sa kasong paglapas sa probisyon sa RA 7160, grave abuse of authority, serious dishonesty ug conduct prejudicial to the interest of the service.

Mahinumduman nga sa milabayng tigom sa komite si Cabanlas mipahimangnu sa mga nanumbong ug sinumbong sa pagtambong sa ipatawag nga tigom aron dili mabasura ang mga gipasakang kaso.

Niini, si Cabanlas nagdapit sa mga hintungdan opisyal ingon man sa mga nanumbong pagtambong sa gitakdang tigom ugmang adlawa sa alas 9:30 sa buntag dinha sa hawanan sa konseho.

Ang tigom gipaabot tambongan nila ni Konsehal Cabanlas, Jose Pepe Abbua, Jr., Girlie Balaba, Romeo Calizo ug Roger Abaday. (SP/JNortiza)