Reklamo batok kapitan sa Brgy 36 desisyonan sa Komite sa Ethics

Gipaabot nga ipakanaug sa Komite sa Ethics and Blue Ribbon ni Konsehal Edgar Cabanlas ang desisyon sa kasong gipasaka batok sa kapitan sa Barangay 36.

Kini human ang komite, sa milabayng tigom, mimando sa nanumbong ug sinumbong pagsumete sa ilang mga position papers aron mapadayag ang ilang mga bahin ug mapakanaug ang patas ug makataronganon nga desisyon.

Mahinumduman nga si Barangay 36 Kagawad Rosalinda Algabre misumbong ni Kapitan Eddie Laguna ngadto sa Ombudsman sa kasong Grave Misconduct. Niini, ang Ombudsman miduso sa sumbong ngadto sa buhatan ni Bise Mayor Bebot Rodriguez tungod kay ang konseho ang adunay katungod sa pagdungog sa kaso batok sa mga sinumbong nga opisyal sa barangay.

Ang milabayng tigom sa komite gitambongan nila ni Konsehales Joey Abbu, Roger Abaday, Aga Suan ug Yvy Emano.