Reklamo batok kapitan sa Brgy 32 gibasura

Gibasura sa Konseho sa Syudad ubos ni Bise Mayor Bebot Rodriguez ang kasong gipasaka batok ni Barangay 32 Kapitan Ronald Seno.

Kini human ang konseho, sa milabayng sesyon, mipasaka sa Resolosyon No. 14669-2023 nga nagsagop sa Order sa Komite sa Ethics and Blue Ribbon kalabot sa kasong gipasaka ni Jonathan Ramonal Emano batok ni Kapitan Seno tungod matod pa sa pagpa-abang sa loteng ilang gipanag-iyahan ngadto sa mga wala mailang indibidwal.

Matod pa nga walay panugot gikan sa mga nanag-iya sa lote ang gihimong pagpa-arkela ni Seno. Sa pagdungog sa komite sa kaso, nasuta nga dili na interesado ang nanumbong nga ipadayon ang kaso gawas pa nga pakyas usab kini dinha sa pagtamod sa mga gipakanaug nga order sa komite.

Ang orden sa komite gilagdaan nila ni Konsehal Edgar Cabanlas, Jose Pepe Abbu Jr., Romeo Calizo, Roger Abaday ug Girlie Balaba.