Reklamo batok kagawad sa brgy Gusa gibasura

GIBASURA sa konseho sa syudad ubos ni Bise Mayor Bebot Rodriguez ang reklamong gipasaka batok sa usa ka kagawad sa barangay Gusa.

Sa sesyon sa konseho niadtong Lunes, gipasaka ang resolosyon nga nagsagop sa order nga giluwatan sa komite sa ethics and blue ribbon kalabot sa BR Case No. 2023-02 nga gipangulohan og “Mr. Porferio A. Barcelo (complainant) versus Barangay Kagawad Camelo Sacala (Respondent),” alang sa kasong physical injuries, paglapas sa RA 6713 ug conduct unbecoming sa usa ka opisyal sa gobyerno.

Si Konsehal Edgar Cabanlas, chairman sa komite, mibutyag nga gibasura na ang kaso human sa gipadayag sa duha ka partido nga pagnagsabot. Sa orden nga giluwatan sa komite, gipadayag nga misaad ang sinumbong nga dili na usabon ang iyang gibuhat nga gidawat usab sa nanumbong.

Ang resolosyon nga gisagop sa konseho alang sa maong katuyuan gipaluyohan usab sa komite sa pamalaod ni Konsehal Cabanlas.