Rehabilitasyon sa multi-purpose hall sa Brgy. Cugman hayan mapatuman na

MAHIMO nang ipatuman sa Barangay Cugman ang ilang mga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan ug galastuhon balor P33,264,588.00.

Lakip sa gipundohan mao ang 20 porsyentong (20%) Development Fund balor P5,686,388.00; samtang P3,326,459.00 usab ang gigahin alang sa pagpatuman sa mga programa sa Sanguniang Kabataan: P1,000,000.00 alang sa rehabilitasyon sa ilang Multi-Purpose hall; P386,000 ang gigahin sa instalasyon sa Street Solar Lights gikan sa Zone-1 paingon sa Zone-10; P250,000 alang sa kampanya kontra illegal nga Druga ug uban pang mga programa nga gilantawng maghatag ug dugang kaarangan sa ilang serbisyo ngadto sa katawhan.

Ang 2025 annual budget sa Barangay Cugman miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (MLRapanot/SP)