Public Works misusi sa Bantiles Creek, kasikbit nga dapit

NAGKAGAMAY ug nagkamabaw nga Bantiles Creek ang nakitang hinungdan sa kanunay nga pagbaha dinha sa Barangay Bugo.

Mao kini ang namatikdan sa mga sakop sa Komite sa Public Works ubos ni Konsehal John Michael Seno human sa gipahigayong ocular inspection sa milabayng semana.

Uban sa panon nga misusi sa Bantiles Creek mao ang mga representante sa Department of Public Works and Highways (DPWH), City Engineer’s Office (CEO), Kapitan Vic Talingting sa Barangay Bugo ug uban pang representante sa pipila ka departamento sa City Hall.

Sa maong pagsusi, nakita nga nagkagamay na ang giluagon sa sapa ug nagkamabaw pa. Namatikdan nga ang kanhi lagpas tawo nga gilawomon, karon matamakan na sa tao..

Nakita usab nga bisan ang drainage sa national highway nga nagkonektar sa maong sapa labihan na usab ka mabaw, butang nga gikahingawa ni Konsehal Seno.

Sa tinguha nga makab-ot ang saktong solusyon sa problema, si Seno mihangyo nga makuha ang kinatibuk-ang hulagway sa maong sapa ug kasikbit nga dapit ug mapresentar sa sunod nga tigom sa komite.