Public Works misuporta sa hangyong solar light, garbage drums dihas Balubal

GIDUSO sa Komite sa Public Works ni Konsehal Edgar S. Cabanlas ang hangyo sa Upland Balubal Homeowner’s Association Inc. sa pagbutang og solar lights sa condo compound og pagdonar og garbage drum diha sa Barangay Balubal ning syudad.

Mahinumduman nga nagsugod na og pamuyo ang mga residenteng nahatagan og mga unit diha sa 40 ka condo buildings nga natukod sa maong lawak. Apan ilang gihangyo nga masugaan ang ilang kadalanan arun luwas sila ilabina sa panahon sa kagabhion.

Ang representante sa City Engineering Office (CEO) mibutyag nga naa nay natukod nga mga poste og nagpadayon na ang pagbutang og transformer sa nasangpit nga dapit, butang nga gipamatud-an ni Pablo Bactong, kapitan sa barangay Balubal.

Midugang usab si Kapitan Bactong nga nanginahanglan usab ang asosasyon og garbage drum kada building tungod kay, sa pagkakaroon, ang mga residente naggamit pa og sako ug ipagawas lamang kini pag-abot sa garbage truck nga maoy mukolekta sa ilang mga basura.

Nunot niini, giaghat ni Konsehal Cabanlas ang City Local Environment and Natural Resources Office (CLENRO) aron paghatag og garbage drums ug nag-awhag sa CEO sa pagbubo sa igong badyet alang sa pagpalit sa solar lights dili lang sa Barangay Balubal kun dili apil usab ang mga ngitngit nga bahin sa syudad.