Public works magtigom karong hapon

MAGTIGOM karong alas 2:00 sa hapon diha sa hawanan sa konseho ang komite sa public works ni Konsehal John Michael Seno.

Tipik sa tukion sa tigom ang special report ni Konsehal Edgar Cabanlas, atol sa sesyon sa konseho niadtong Lunes nga gidumala ni Bise Mayor Jocelyn Rodriguez, nga nanawagan ug nakisayod in aid of legislation sa tukmang kahimtang sa loteng gipalit sa dakbayan nga gipanag-iyahan sa Bell Church Foundation dinha sa barangay Macasandig nga unta gamiton sa pagpalapad sa access road.

Gibutyag ni Cabanlas nga niadto pang 2011 nagpalabang ang konseho og ordinansa nga naggahin sa igong kantidad aron ipalit sa maong luna human kini naapektohan sa gitrabahong access road nga magkonektar sa gitukod nga tulay sa dapit.

Gidapit nga motambong sa tigom sila si city administrator Atty. Hilario Raagas, city legal officer Atty. Kenneth Tamala ug acting city engineer Jenito Asequia. (SP/JRGalano)Konseho misuporta sa CDO Financial Recovery ProgramHUGOT nga gisuportahan sa konseho sa syudad ubos ni Bise Mayor Bebot Rodriguez ang mga lakang sa administrasyon ni Mayor Klarex Uy nga makabangon human sa nasinating pandemya.

Sa sesyon niadtong Lunes, gipasaka sa konseho ang resolosyon nga nagsagop sa Executive Order No. F013-2022 sa mayor nga nagmando sa pagsagop sa mga fiscal measures ug control dinha sa pagpatuman ug paggamit sa Annual ug Supplemental Budgets sa kagamhanan sa dakbayan sa Cagayan de Oro dala ang paglantaw sa Financial Recovery Program gumikan sa dakong epekto sa Covid 19 pandemic.

Niini, malaumon si Bise Mayor Bebot Rodriguez nga makatabang ang ipatumang mga lakang aron daling makabangon ang dakbayan.