Public mkt sa Macabalan gisugyot matukod dihas Piaping Itum

Konsiderahon sa komite sa economic enterprises ni Konsehal Ian Mark Nacaya ang laraw nga konseho sa barangay Macabalan nga mabalik sa Piaping Itum ang pagatukurong merkado publiko sa barangay.

Kini human nasuta nga ang gisugyot nga lugar nga tukuran nga Purok Punta dili haum sa proyekto tungod kay wala kini sa listahan sa mga allowable uses sa water zone areas subay sa Ordinance No. 13032-2016 sa dakbayan.

Dugang pa, giingon nga wala usab gitugot ang maong konstraksyon base sa giya nga gilatid sa Zoning Map of Integrated Zoning Ordinance.

Apan, ang mga opisyal sa barangay naninguha nga matukuran gayud sila og merkado publiko alang sa kasayon sa pagpangmerkado sa ilang mga molopyo ug usab mahatagan sa kapanginabuhian ang kanhi mga namaligya sa daang merkado.

Niini, ilang gisugyot nga tukuron ang proyekto dinha sa Purok Piaping Itum dala ang hangyo nga unta kini mapundohan sa kagamhanan sa dakbayan.