Proyektong balor P2M alang sa fisherfolk gituki sa komite ni Achas

GITUKI sa Komite sa Fisheries and Aquatic Resources ubos ni Konsehal Christian Rustico Achas ang pagpatuman sa Php 2 milyones balor nga proyekto alang sa mga mangingisda sa 12 ka coastal barangay ning syudad alayon sa programang Malinis at Masaganang Karagatan (MMK) sa Department of Agriculture ug Bureau of Fisheries and Aquatic Resources.

Atol sa tigom, ang representante sa Agricultural Productivity Office (APO) mibutyag nga nahikay na ang 5 ka purchase request (PR) ug aduna na usab purchase order alang sa gihangyo sa kapunungan sa mangingisda.

Apan iyang gitin-aw nga dili nila kontrolado ang proseso aron mapadali ang pag-deliver sa gikinahanglan sa mga mangingisda.

Si Larry G. Sabella, presidente sa Federation of Associated Fisherfolk Organization in CDO Coastal Area, Inc. (FAFOCCA, Inc), mibutyag nga dili lamang ang kadugayon sa pagproseso sa gihangyong ekipo alang sa ilang panginabuhian ang ilang namatikdan, kung dili apil na usab ang wala nagkadimao nga item description sa maong purchase request.

Dugang ni Sabella nga 20 ka marine engines ug mga pre-starter feeds ang naapil sa purchase order bisan wala nila kini sa ilang project proposal, butang nga gikatingala sa pederasyon. Hook and line ug fishing gears lang ang ilang gilista sa maong project proposal, sumpay ni Sabella.

Hinuon, ang representante sa APO namahayag nga ang tanang nakalista sa purchase request gibase lamang sa usa ka “consolidated” project proposal nga gisumite sa ilang buhatan. Busa, siya mihangyo nga maduso ngadto sa ilang buhatan ang listahan sa mga butang nga gikinahanglan sa kapunungan aron matandi kini sa naka-PR na.

Subay niini, si Kagawad Aga Suan, kinsa mitambong sa maong tigom, miaghat sa APO nga makig-coordinate sa City General Services Office (CGSO) ug sa fisherfolk federation aron makanselar ang mga sayop nga na-request o’ hangyoon ang supplier nga bayloan ang mga kahimanan ayha e-deliver sa fisherfolk.

Mahinumduman nga gi-award ang maong MMK sa mga mangingisda niadtong 2018, apan diha na sa tuig 2023 na-download ang budget alang niini.

Busa, gitagaan ni Konsehal Achas ang buhatan sa City Agriculture ug usa ka semana aron maplastar ang pag-implementar sa maong proyekto sa tinguha nga madawat na kini sa mga grupo sa mangingisda sa labing daling panahon.