Proyekto sa DTI nga waste-to-energy incineration project gihingusgan-Pascual

SI Konsehal Jay Pascual, Chairman sa Komite sa Agriculture, mipahibalo sa konseho mahitungod sa pagpatuman sa waste-to-energy incineration project sa Department of Trade and Industry (DTI).

Kini ang gipaabot sa konsehal atol sa sesyon niadtong Lunes nga gidumala ni Presiding Protempore Konsehal Romeo Calizo agig reaksyon sa special report ni Konsehal Bernie Esparcia kabahin sa problema sa gidaghanon sa mga basura nga natapok diha sa material recovery facility sa Barangay Pagatpat.

Mibutyag si Pascual nga ang buhatan sa DTI migahin sa dili mominus sa P25 milyones alang sa maong proyekto nga giingong adunay fasilidad nga kayang mu-proseso sa  substan sya gikan sa  basura  aron  mahimo kini nga  enerhiya.

Gani, aduna nay mga syudad nga nag-implementar na sa maong proyekto nga nakasinati og maayong resulta human nakita nga ang pagsunog usa ka proseso nga maghatag solusyon sa problema sa basura, matod sa konsehal.

Dugtong niini, gibutyag ni Pascual nga ang DTI nagkinahanglan lamang og suporta gikan sa kagamhanan aron  hingpit nang  ma-implementar ang maong proyekto dinhi sa syudad.

Niini gisugyot ni Pascual nga maapil kini mga proyekto sa DTI atol sa gitakdang deliberasyon sa mga hintungdang komite.