Proyekto pagtul-id sa mga kanal gipundohan sa Brgy 22

Gipaabot nga maminusan na ang problema sa pagbaha diha sa Barangay No. 22, ning syudad. Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang 2023 Annual Budget nga adunay gibanabanang kinitaan ug galastohon balor P6,081,860.

Tipik sa gihatagan sa prioridad sa maong budget ang pagrehabilitar sa ilang drainage line canal ug dalan sa tinguha nga maminusan ang problema sa pagbaha sa dapit. Dugang niini, migahin usab ang barangay og igong pundo nga magamit pagtubag sa panginahanglan sa katawhan panahon sa kalamidad, dugang pundo alang sa mga programa sa kabatan-onan, pag-instalar og suga sa kadalanan, pagrehabilitar sa material recovery facilitity ug uban pang mga programa nga gilantawng maghatag og dugang kalamboan sa ilang dapit.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya.