Proyekto pagtul-id sa drainage system sa Canitoan gilantaw

Mokabat sa P2.9 milyones ang gigahin sa barangay Canitoan aron magamit nga pundo pagtul-id sa ilang mga drainage.

Kini human giuyonan sa konseho sa syudad ubos ni Bise Mayor Bebot Rodriguez ang gisumeteng 2023 Annual Budget sa Barangay Canitoan nga adunay gibanabanang kinitaan ug galastohon balor P43.18 milyones kapin.

Ang maong proyekto naglakip sa pagtul-id sa drainage system sa Zone 1 nga mobalor og P1.2 milyones, drainage sa Zone 2 ug Zones 1-10 balor tag-P600 mil ug drainage sa Zone 4 balor P500 mil.

Lakip sa gipundohan sa barangay nga mapatuman mao ang proyekto pagtukod og pansayan sa mga evacuation centers, pagtul-id s Barangay Isolation Unit, pagpatuman og livelihood development projects, pagpalit og relief goods ug food assistance alang sa mga biktima sa Covid-19, pag-instalar og street lightings ug pagpalit og lote nga magamit nga pampublikong sam-ang.

Ang maong mga proyekto nasukip sa 20% Development Fund sa barangay nga mobalor og P7.52 milyones.

Ang resolosyon nga gipasaka sa konseho alang sa maong katuyuan gipaluyohan sa komite sa barangay affairs ni Konsehal Alam Lim ug komite sa pamalaod ni Konsehal Ian Mark Nacaya.