Programa sa kabatan-onansa Brgy. 18 gisuportahan ni Konsehal Seno

HAYAN mahatagan sa dugang kaarangan ang kinabuhi sa kabatan-onan diha sa Barangay 18 ning syudad.

Kini human ang konseho sa syudad ubos ni Bise Mayor Kikang Uy sa sesyon niadtong Lunes misagop sa resolosyon nga nag-uli sa ordinansa diin nasukip ang gisumeteng Sangguniang Kabataan 2021 Annual Budget balor P362,252.

Ang maong pundo gamiton sa pagpatuman sa ilang mga programa ug proyekto nga gihatagan og prayoridad ning tuiga subay sa mandato sa RA 10742 kon Sangguniang Kabataan Reform Act of 2015.

Si Konsehal John Michael Seno, chairman sa komite sa sports & youth development kinsa usa sa nagpaluyo sa gisagop nga resolosyon miingon nga hugot niyang gisuportahan ang maong lakang human nakita nga nahisubay kini sa balaod ug dako ang ikatabang alang sa kaarangan og kalamboan sa mga kabatan-onan.

Ang resolusyon nga gipalabang sa konseho alang sa maong katuyoan gipaluyohan usab sa komite sa barangay affairs ni Konsehal Yan Lam Lim ug komite sa pamalaod ni Konsehal Ian Mark Nacaya.