Programa sa health care mgmt gipalapdan

Dugang fasilidad ang ipahimutang dinha sa sanitary landfill aron mapalapdan ang programa sa local health care management sa dakbayan.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez maghatag og katungod ni Mayor Klarex Uy pagpirma sa Memorandum of Agreement (MoA) ug Deed of Donation (DoD) tali sa Department of Environment and Natural Resources (DENR-10) alang sa pagpahimutang sa Preliminary Disinfection and Storage (PDS) Facility sa sanitary landfill diha sa Sitio Baracan, barangay Pagalungan.

Ang DENR-EMB region 10 mitunol og usa ka unit nga 20-foot container nga adunay 63 ka yellow bins ug 100 litro nga kapasidad ug 3,150 ka yellow trash bags ug uban pang miscellaneous items nga mobalor og P800 mil.

Tumong sa programa nga masuportahan ang pag-establisar sa PDS Facilities alang sa koleksyon sa Covid-19 related health care waste gikan sa mga quarantine facilities ug vaccination sites.

Ang ordinansa nga gipalabang sa konseho alang sa maong katuyuan gipaluyuhan sa komite sa environment ni Konsehal Roger Abaday ug komite sa pamalaod ni Konsehal Ian Mark Nacaya.