Programa sa edukasyon, kampanya kontradroga gipundohan sa SK sa Mambuaya

BALOR P266 mil ang gigahin sa Sangguniang Kabataan (SK) sa Barangay Mambuaya aron ipalit og ekipo nga magamit sa ilang buhatan ug sa pagrehabilitar sa Multi-Purpose Hall.

Kini human nadawat ni Konsehal John Michael Seno, chairman sa komite sa Sports and Youth Development, ang gisumeteng annual budget sa Sk sa mambuaya nga adunay gibanabanang kinitaan ug galastohon balor P908,901.00.

Lakip sa gipundohan mao ang programa sa edukasyon ilabina ang paghatag og dugang kahibalo sa kabataan sa natad sa panglawas, pagproteher sa kinaiyahan, pagpatuman sa kampanya kontra droga, youth employment and livelihood, gender sensitivity, mga kalihokan pahaom sa kasaulogan sa Linggo ng Kabataan ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang kinabuhi.