Programa sa edukasyon gitutokan sa Brgy Patag SK

Balor sa P250 mil ang gigahin sa Sangguniang Kabataan (SK) sa Barangay Patag aron mapatuman karong tuiga ang mga programa alang sa edukasyon ilabina sa paghatag og tukmang impormasyon kabahin sa panglawas ug kampanya kontra droga sa kabatan-onan.

Kini human ang konseho sa syudad, sa milabayng sesyon nga gidumala ni Presiding Officer Protempore Konsehal Romeo Calizo, misagop sa resolosyon nga nag-uli sa resolosyon sa SK diin nasukip ang ilang 2023 annual budget nga adunay gibanabanang kinitaan ug galastohon balor P1,974,162.00.

Lakip sa gihatagan sa prioridad nga mapatuman karong tuiga ang programa sa pagpalambo sa paugnat sa kusog, pagproteher sa kinaiyahan, capacity building, disaster risk reduction and resiliency, ug pagpalit og usa ka unit nga printer with scanner ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang dapit.

Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga resolosyon, mipadayag sa iyang suporta sa maong lakang human nakita nga makatabang kini dinha sa pagkab-ot sa kaarangan ug kalamboan sa kinabuhi sa kabatan-onan.

Ang resolosyon nga gisagop sa konseho gipaluyohan usab sa komite sa pamalaod ni Konsehal Edgar Cabanlas.