Programa, proyekto sa Barangay Balulang mapatuman na

MAHIMO nang mapatuman sa Barangay Balulang ang ilang mga gihan-ayng programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibana-banang kinitaan ug galastohon balor P38,078,086.00.

Tipik sa gipundohan mao ang 20 porsyentong development fund balor P6,243,128.00; samtang P3,807,809.00 usab ang  gigahin alang sa pagpatuman sa mga programa ug proyekto sa Sanguniang Kabataan (SK); P500,000.00 ang gigahin alang sa pagtul-id sa ilang mga guba nga dalan; P400,000.00 alang sa pag-improbar sa ilang mini market ug uban pang mga programa nga gilantawng makahatag kaarangan sa ilang serbisyo ngadto sa katawhan.

Ang 2024 annual budget sa Barangay Balulang miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang mapatuman sa labing daling panahon.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.