Programa, proyekto sa Balulang mapatuman na

HINGPIT nang mapatuman sa barangay Balulang ning syudad ang ilang mga programa ug proyekto ning tuig 2021.

Kini human ang konseho sa sesyon niadtong Lunes nga gidumala ni Bise Mayor Kikang Uy misagop og resolusyon nga nag-uli sa ordinansa sa barangay nga may kalabutan sa ilang Annual Budget nga adunay gibanabanang kinitaan ug galastohon balor P36,392, 010.

Lakip sa gipunduhan sa maong budget ang pagrehabilitar sa ilang multi-purpose hall ug health center, pagpalit og mga medical equipment, pagpatuman sa Solid Waste Management Urban Greening Program ug pag-instalar og suga sa kadalanan.

Gigahinan usab sa barangay ang pagrehabilitar sa ilang drainage system ug kadalanan ingon man pagpamalit og pipila ka gamit sa ilang buhatan.

Si konsehal Yan Lim mipasabot nga ang maong ordinansa miagi sa makuting pagtuon ug deliberasyon sa lain laing komite sa konseho ug nasuta nga mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Lim ug komite sa pamalaod ug reglamento ubos ni Konsehal Ian Mark Nacaya.