Programa nga makapadasig sa kabatan-onan gipundohan sa SK sa Canitoan

GIHINGUSGAN sa Sangguniang Kabataan (SK) sa Barangay Canitoan nga mapatuman karong tuiga ang mga programa alang sa kabatan-onan sa ilang dapit.

Kini human nadawat sa Konseho sa Syudad ubos ni Bise Mayor Bebot Rodriguez ang gisumiteng annual budget sa SK sa barangay nga adunay bana-banang kinitaan ug galastohon nga P4.5 milyones kapin.

Tipik sa gipundohan sa SK sa maong barangay ang pagpatuman karong tuiga ang mga programa alang sa mga kalihokan pahaom sa kasaulogan sa Linggo ng Kabataan, paugnat sa kusog, youth summer convention, ug uban pang proyekto alang sa kabatan-onan sa Canitoan.

Migahin usab ang barangay og igong pundo nga magamit alang sa programa sa edukasyon ilabina dinha sa pagpaabot sa insaktong impormasyon kabahin sa panglawas, gender sensitivity, pagproteher sa kinaiyahan ug kampanya batok sa gidiling druga.

Ang nahisgotang annual budget sa SK sa Barangay Canitoan gipaabot nga tukion sa umaabot nga tigom sa komite sa sports and youth development ni Konsehal Kenneth John Sacala. (RNQuiblat/SP)