Programa batok child labor mapatuman sa CDO

Gilantawng mapalapdan pa ang programa sa kagamhanan sa dakbayan sa Cagayan de Oro dinha sa pagproteher sa katungod sa kabataan sa natad sa pagpanarbaho.

Kini human ang konseho sa syudad ubos ni Bise Mayor Bebot Rodriguez, sa sesyon niadtong Lunes, mipalabang sa ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Department of Social Welfare and Development –Field Office X (DSWD-10) alang pagpatuman sa Strategic Helpdesks for Information, Education, Livelihood and other Developmental Interventions (SHIELD) batok sa child labor.

Niini, ang DSWD-10 magpahigayon og marketing activities and advocacy campaign sa pagpatuman sa programa, magpahigayon og konsultasyon ingon man environmental scanning ug resource profiling sa gitumbok nga lokal nga kagamhanan sa pakigtambayayong sa DSWD Program Management Bureau.

Samtang ang dakbayan sa Cagayan de Oro mopatuman sa programa aron maseguro nga maprotektahan ug mapalambo ang kinabuhi sa kabataang nanarbaho ug sa ilang mga pamilya.

Si Konsehal Girlie Balaba, chairman sa komite sa labor and employment ug nangamahan sa ordinansa, mibutyag nga aron hingpit nga pagpatuman ang programa kinahanglang maseguro ang partisipasyon sa mga opisyal sa barangay.

Dako ang iyang paglaum nga pinaagi sa programa daghang kabataan ang maprotektahan ug dili malupigan sa ilang katungod dinha sa pagpanarbaho.