Problema sa transport cooperative, gisolusyonan sa Komite ni Calizo

DALING gisolusyonan sa Komite sa Public Utilities sa konseho ubos ni Konsehal Romeo Calizo ang hangyo sa Balulang Transport Service Cooperative (BTSC) nga did-an ang mga modernized jeepneys sa PN Road Canitoan Transport Cooperative (PONSTRANCO) nga motabok diha sa Balulang  Road.

Sa tigom sa komite niadtong Martes, ang representante sa BTSC mibutyag nga ilang gihangyo nga  dili lang usa mag-operate ang POTRANCSO og modernized jeepneys sulod sa usa katuig aron malikayan ang kabalaka nga dili nila maabot ang ilang binulan nga bayrunon sa ilang loan sa ilang mga units.

Sa ilang bahin ang PONTRANSCO mibutyag wala pa man gayud sila nagpadagan og modernized  jeepneys agig pagsanong sa ilang hangyo maong ilang gihatagan og kahigayonan nga sila ang mauna.

Sumala ni Calizo nga pagsinabtanay lang ang gikinahanglan sa duha ka grupo, apan iyang giklaro nga dili mahimo nga babagan ang maayong modernization program sa Land Transportation Franchising ang Regulatory Board (LTFRB) sa public utility vehicles.

Hinuon gipasabot ni Calizo nga anaa sa tukmang pagdumala ug wala sa kakulangon sa pasahero ang problema  mao nga gikinahanglan lang ang disiplina pinaagi sa pagsunod sa balaod.

Niini, giduso sa Komite ang maong hangyo sa BTSO ngadto sa LTFRB aron modumala sa pagsabot sabot sa duha ka grupo.