Problema sa traffic sa 3 brgys giawhag nga masolosyonan

Dako ang kahingawa ni Konsehal John Michael Seno, chairman sa Komite sa Public Works, nga nasinati sa katawhan sa dakbayan ang sobrang pagkabukog sa dagan sa trapiko diha sa Barangay Agusan, Puerto, Bugo ug lahos ngadto sa Tagoloan, Misamis Oriental.

Kini ang gipaabot sa konsehal atol sa sesyon sa konseho niadtong Lunes nga gidumala ni Bise Mayor Bebot Rodriguez. Matod ni Seno nga sa kasamtangan adunay duha ka proyekto ang gipatuman sa Department of Public Works and Highways (DPWH) sa dapit nga mobalor og P100 milyones.

Kini naglangkob sa road widening project gikan sa Tagoloan-Cagayan de Oro ug elevation sa bridge sa Barangay Puerto hinungdan sa sobra kapiot nga traffic sa dapit. Matod niya nga importante kaayo unta ang koordinasyon tali sa lokal nga kagamhanan, DPWH ug kontraktor sa dili pa magsugod ang proyekto aron mapangandaman ang kahapsay sa dagan sa trapiko.

Niini, siya mibutyag nga usa sa nakitang solosyon sa konsehal mao nga ang mga dagkong trak gikan sa Bukidnon area didto na moagi sa Manolo Fortich diretso sa Libona, Bukidnon lahos sa Barangay Indahag, ning syudad inabagan sa mga kawani sa Roads and Traffic Administration (RTA). Dako ang iyang kabalaka nga nakaapekto sa mga negosyante ang gipatumang proyekto ilabina ang road elevation sa bridge. Iyang gipanawagan nga mahatagan sa solosyon ang posibleng pagtaas sa dalan ug matabonan o’ matagoan na ang ilang mga establisamento.

Niini, si Seno misugyot sa pagpahigayon og matuking pagtuon sa isyu aron posibleng mahimo ang koordinasyon tali sa duha ka lokal nga kagamhanan sa Manolo Fortich ug Libona, Bukidnon ug uban pang mga alternatibong solosyon nga makatabang aron mapagaan ang dagan sa trapiko sa dapit.