Problema sa panubig dakong suliran sa CDO –Rodriguez

ANGAYAN natong lantawon isip konseho sa dakbayan ang suliran sa panubig u gang serbisyo nga gitanyag sa Cagayan de Oro Water District (COWD).

Mao kini ang panawagan ni Konsehal Bebot Rodriguez atol sa sesyon sa konseho niadtong Lunes nga gidumala ni Bise Mayor Kikang Uy.

Sa iyang pakisusi, ang konsehal mibutyag sa iyang nahibaloan sa mga kasabutan nga gilagdaan sa Water District alang sa supply sa tubig sa syudad.

Iyang nabal-an nga ang joint venture agreement sa Water District ug Metro Pacific Water miresulta sa pagtukod og bag-ong korporasyon nga ginganlan og Cagayan de Oro Water Bulk, Inc. (COBI).

Matod niya nga ang COBI gidumala usab og laing special corporation nga ginganlan og Metropac Cagayan de Oro Holdings, Inc, nga 100% owned sa Metropac Investment.

Kadaghan bang korporasyon nga nagpatong patong sa joint venture nga posibleng miresulta sa patong patong usab nga presyo sa tubig kay mapaginansya man gyud ang mga korporasyon, pasabot ni Rodriguez.

Ang maong joint agreement adunay termino nga 50 ka tuig gikan sa paglagda niadtong tuig 2017 kun hangtod pa sa tuig 2067 samtang ang presyo sa gibaligyang tubig ngadto sa katawhan nagbasi sa bulk water supply agreement.

Wala kitay idea og pila gayud ang presyo sa tubig apan segun sa taho ni Konsehal Lordan Suan, sobra kaayo ang presyo nga gipahamtang sa Water District sa gitugutan sa Local Water Utilities Administration (LWUA), sumpay sa konsehal.

Niini, si Rodriguez mikwestyon sa ka epektibo sa Water District sa pagdumala sa water supply services dinhi sa syudad ug nanawagan sa pagpahigayon og imbestigasyon aron masuta ang insaktong kahimtang sa panubig ug masolosyonan ang dugay nang mulo sa katawhan.