Problema sa panubig angay matubag sa Water District –Abaday

Gipasabot ni Konsehal Roger Abaday nga ang kadagkuan sa Cagayan de Oro Water District (COWD) maoy angayang mohatag sa ilang katin-awan kabahin sa hinay ug limitado nga supply sa panubig dinha sa kabarangayan kay ana-a kanila ang problema.

Kini ang reaksyon sa konsehal kalabot sa panawagan ni Konsehal Bernie Esparcia, atol sa sesyon sa konseho niadtong Lunes nga gidumala ni Bise Mayor Jocelyn Bebot Rodriguez, nga unta mapadali ang pagproseso sa mga proyekto sa ubang water system concessionaires sa tinguha nga masolos-yonan ang problema sa supply sa panubig dinhi sa syudad.

Si Abaday mibutyag nga dugay na kini nga reklamo sa katawhan nga nakahatag og kahasol ug perhuwisyo sa matag adlaw nilang panginahanlan sa panimalay.

Niini, gikalipay ni Abaday ang tinguha ni Esparcia nga mapangitaan og pamaagi nga mapadali ug masolosyonan ang problema sa kakulangon sa supply sa panubig dinhi sa syudad.