Problema sa pagbaha sa Bugo tukion sa Kom. sa Climate Change

KONSIDERAHON sa Komite sa Climate Change Adaptation and Mitigation and Disaster Risk Reduction atol sa tigom karong adlawa ang special report ni Konsehal Esparcia atol sa regular session sa konseho.

Mahinumduman nga ang konsehal sa iyang special report mibutyag nga diha sa Bugo kaniadto bisan og unsa pa ka kusog ang bundak sa ulan, wala niya nakita nga gabaha ang maong dapit.

Sumala usab ni Esparcia nga iyang nabantayan nga adunay natukod nga dagkong proyekto sa ibabaw’ng bahin sa Bugo nga maoy gidudahan sa mga residente nga  hinungdan sa mga pagbaha.

Buot  niya kining maimbestagahan.

Subay niini, gidapit sa komite pagtambong sa maong tigom si City Administrator Atty.  Roy Hilario Raagas, City Legal Officer Atty. Kenneth Tamala, Chedilyn Aissa Dulguime-Officer In-charge sa City Planning and Development Office (CPDO), Punong Barangay Spencer Cailing  ug  De Jan  Paulo Lisondra, District  Engineer,  2nd District Engineering Office (DPWH) aron makuhaan sa ilang opinyon.