Pribadong eskwelahan gihangyo magbutang personahe magmando sa trapiko -Esparcia

GISUGYOT ni Konsehal Malvern Esparcia, Chairman sa Komite sa Climate Change Adaptation and Mitigation and Disaster Risk Reduction, nga hangyooan ang mga pribadong eskwelahan sa syudad nga magbutang sa ilang kaugalingon nga personahe aron motabang sa paggiya sa mga estudyante nga motabok sa pedestrian lane ug mag-abag usab sa dagan sa trapiko sa maong dapit.

Gipaambit ni Konsehal Esparcia ang maong sugyot atol sa sesyon niadtong Lunes nga gidumala ni Bise Mayor Bebot Rodriguez agig reaksyon sa special report ni Konsehal Suzette Daba mahitungod sa mga aksidente nga gakahitabo tungod kay adunay mga drivers nga dili mohunong bisan adunay nagtabok sa pedestrian lane.

Sumala ni Esparcia nga gawas nga walay insaktong parking area ang pipila ka eskwelahan nga maoy hinungdan sa pagkabukog sa dagan sa trapiko, wala usab personahe sa tulunghaan nga moabag aron maminosan ang problema sa trapiko.

Niini suportado ni Esparcia ang panawagan ni Konsehal Daba nga hatagan sa igong pagtagad sa Roads and Traffic Administration ang maong problema alang sa kasigurohan sa mga estudyante ug ginikanan aron malikayan ang dugang disgrasya sa kadalanan.