Plastic Smart Cities Initiative mapatuman sa CDO

Hayan maminusan na ang polusyon sa plastic diha sa Macajalar Bay. Kini human ang Konseho sa syudad, sa sesyon niadtong Lunes nga gidumala ni Presiding Officer Protempore Konsehal Romeo Calizo, mipalabang sa ordinansa nga naghatag og panugot ni Mayor Klarex Uy pagpirma sa Memorandum of Understanding (MoU) tali sa Kabang Kalikasan ng Pilipinas Foundation, Inc. (KKPFI) kalabot sa pagpatuman sa Plastic Smart Cities Initiative. Ang programa naglangkob sa pagpalambo sa Replicable Solid Waste Management diha sa Barangay Lapasan ug Carmen, mga natumbok nga model o’ pilot barangays diin unang ipatuman ang maong programa.

Ubos sa MoU, ang dakbayan pinaagi sa City Local Environment and Natural Resources (CLENRO) makigtambayayong sa KKPFI dinha sa pagplano, pag-ila ug pagpatuman sa mga solusyon nga naglambigit sa palisiya, negosyo, pagpalambo sa waste management system, edukasyon ug uban pang programa aron makunhuran ang polusyon dala sa ilabay nga mga plastic nga moabot dinha sa Macajalar Bay.

Sa ilang bahin, ang KKPFI magdestino og manager nga makig-alayon sa syudad alang sa hamugaway nga pagpatuman sa programa ug pagpahigayon sa gikinahanglang kalihokan aron epektibong ma-implementar ang mga proyekto. Ang KKPFI, usa ka kapunungan sa World Wide Fund for Nature (WWF), non-stock, non-profit organization nga nakiglambigit alang sa pagproteher ug pagpreserba sa kinaiyahan sa mga piniling lugar sa nasud.

Nasayran nga ang kagamhanan ug ang KKPFI adunay managsamang tumong nga protektahan ang Macajalar Bay aron maminusan ang polusyon sa plastic. Ang ordinansa nga gipalabang sa Konseho alang sa maong katuyuan gipaluyuhan sa Komite sa Environment ni Konsehal Roger Abaday ug Komite sa Pamalaod ni Konsehal Edgar Cabanlas.