Pilot test alang sa motorcycle taxi giuyonan

Hiniusang giuyonan sa Komite sa Public Utilities (Roads and Traffic Management) ni Konsehal Romeo Calizo ang laraw sa Move it, usa ka motorcycle taxi company, nga mag-operate sa syudad.

Kini human nagpadayag sa ilang pag-uyon sila si LTFRB 10 Regional Director Aminoden Guro ug LTO Assistant Regional Director Engr. Jesus Chan sa kondisyon nga masunod sa kompanya ang gisitar sa gobyerno nga gabayan sa maong matang sa operasyon, sama sa kadako sa makina sa motorsiklo ug kinahanglan dili molapas sa lima ka tuig ang mga unit nga gamiton sa pagpamasahero.s

Sa milabayng tigom, si Calizo mibutyag nga dakong tabang ang motorcycle taxi sa kakulangon sa transportasyon sa syudad ilabina panahon sa lawom nga kagabhion diin adunay pipila ka mga molopyo nga mao pay mag-uli gikan sa ilang mga trabaho.

Ang aplikasyon sa Move It giduso sa komite ngadto sa Komite sa Pamalaod aron malakip sa mga hisgutanan sa umaabot sesyon sa Konseho.