Pet adoption gisuportahan ni Cabanlas

GIPADAYAG ni Konsehal Edgar Cabanlas, chairman sa komite sa urban poor, ang iyang pagpakabana sa mga  iro nga  masikop sa  City Impound Section  sa City Veterinary Office nga dili malukat sa mga tag-iya.

Sa sesyon sa konseho niadtong Lunes nga gidumala ni Bise Mayor Bebot Rodriguez, nakisayod ang konsehal ngadto  ni City Veterinarian Dr. Helen Ann Tacundong kon  aduna ba silay programa  alang  sa pet adoption sa mga latagawng iro nga ilang  masikop  ubos sa ilang Oplan Pamatong.

Gipasabot ni Tacundong  nga  anaa kini nga programa ug naka post pa kini  sa social media ang mahitungod sa  “pet adoption”. Gani nahimong  kaabag   ang  mga Non-Government Organizations (NGO) diha sa  pagmonitor  ug  pag-ayag  sa mga adaptor nga adunay  potensyal  nga mosagop sa iro  aron masiguro nga ila gayod kining hingpit nga maatiman.

Gasusihon  usab nila ang  dapit diin ipahimutang  ang gisagop nga mga iro  aron masigurong maatiman gayod kini , dugang pahayag ni Tacundong.

Subay niini, gipadayag ni Konsehal Cabanlas ang iyang suporta sa programa bahin sa pet adoption. (JRGalano/SP)