Personahe nga mopasabot sa mga mapaakan sa iro, gisugyot ni Esparcia

GISUGYOT ni Konsehal Bernie Esparcia, Chairman sa Komite sa Climate Change, ngadto sa City Health ang pagbutang og personahe nga maoy mopasabot sa mga napaakan sa iro aron dili mabalaka.

Kini ang gibutyag ni Konsehal Bernie Esparcia atol sa sesyon sa Konseho niadtong Lunes nga gidumala ni Bise Mayor Bebot Rodgriguez human mipresentar  og   special report  mahitungod  sa usa ka tao nga  napaakan sa laaw nga  iro  nga midangop sa CHO aron magpatupok og anti-rabbies  apan giingong gibalibaran  ug ipabalik  sa sunod pang mga adlaw.

Si Konsehal Lourdes Gaane mibutyag  nga tungod  kay libre raman  ang vaccine sa rabbies diha sa CHO, matag adlaw daghan gayud  ang galinya nga halos gaabot na sa gawas nga bahin.

Hinoon, si  Konsehal Esparcia mipasabot nga iyang nasabtan ang sitwasyon apan iyang gihangyo nga kon dili man gani matupokan dayon ang pasyente kinahanglan adunay ibutang nga personahe  nga maoy tahasan mopasabot  sa   pasyente  nga dili  madismaya og  dili  mataranta.