PDEA miklaro nga wala sa listahan sa IDID si Congressman Uy

Hugot nga giklaro sa Philippine Drug Enforcement Agency (PDEA) atol sa gipatawag nga tigom sa gimugnang Committee of the Whole nga gidumal ni konsehal Romeo Calizo nga wala sa opisyal nga listahan sa Narcolist si Congressman Klarex Uy.

Kini nunot sa special report ni konsehal Enrico Salcedo, chairman sa komite sa environment and natural resources sa sesyon niadtong Lunes nga gidumala ni Konsehal Edna Dahino.

Mahinumduman nga una nang gisugyot ni Salcedo nga maklaro kon unsang matang sa listahan nga gikoptan sa nag-akusar ug masuta kon kini authenticated o verified nga listahan gikan sa ahensya.

Sa maong tigom, gibutyag sa PDEA nga wala malakip o wala makita ang ngalan sa kongresman sa Inter Agency Drug Information Data Base (IDID), ang opisyal nga listahan sa ahensya nga diin maoy tinubdan sa listahan sa mga personahe o politiko nga nahilambigit sa druga subay sa gipahiyong imbestigasyon.

Gipasabot ni Salcedo nga kinahanglan nga maresolbar o mahuman na kini nga isyo ug pasangil tungod kay nakatugaw kini sa kahusay ug kalinaw sa syudad.

Niini, gipasalamatan sa komite ang PDEA ug ubang hintungdang ahensya nga misanong sa imbestigasyon og mitubag sa ang ilang mga pangutana alang sa maong katuyuan.