Patas nga kahigayonan sa giingong mga nalambigit sa anomaliya sa CHUDD gisugyot

Malaumon si Konsehal Imee Moreno nga matagaan sa patas nga kahigayonan dinha sa ipahigayong imbestigasyon ang giingong mga nalambigit sa anomaliya sa opisina sa City Housing and Urban Development Department (CHUDD).

Kini ang sugyot ni Moreno human si Konsehal Edgar Cabanlas, sa sesyon sa konseho niadtong Lunes nga gidumala ni Bise Mayor Jocelyn Bebot Rodriguez, mitaho sa namatikdang anomaliya sa CHUDD dinha sa pag-apod apod sa mga lote ug housing units sa relocation sites sa dakbayan. Nagtoo si Moreno nga angayan usab nga mapaminaw ang kabahin sa mga gitumbok nga personahe aron mahatagan sila sa ilang higayon nga matubag ang isyu ug malikayan ang una nang paghukom sa katawhan.

Niini, siya nanghinaut nga mahatagan sa kahigayunan ang tanan atol sa ipahigayong imbestigasyon sa komite sa urban poor ni Konsehal Cabanlas.