Patas nga kahigayonan alang mga negosyante sa Cugman giawhag

Malaumon si Konsehal Imee Moreno nga mahatagan sa patas nga kahigayonan ang mga negosyante nga mobubo sa ilang patigayon sulod sa teritoryo sa barangay Cugman.

Kini ang gihingusgan sa konsehal human gipalabang sa barangay Cugman ang ordinansa nga nag-aghat sa tanang pribadong establisamento, kontraktor ug susamang mga negosyo nga mo-empleyo og dili mominus sa 30 porsyento (30%) sa ilang workforce gikan sa kwalipikado ug tinuod nga mga molopyo sa barangay.

Gipasabot ni Moreno nga tinguha man sa barangay nga mahatagan sa kahigayonan nga makapanarbaho ang ilang mga molopyo angayang lantawon usab ang bahin sa mga negosyante kinsa maglisod sa pagsugod sa ilang operasyon kun dili moabot sa 30% ang mga trabahanteng molopyo sa Cugman.

Iyang gipangutana ang mga panahon nga walay makuhang skilled o’ kwalipikado sa usa ka posisyon nga taga-Cugman, unsa man ang atong mahatag nga solosyon o’ unsa man ang gitanyag sa barangay?

Kinahanglang masukip sa ordinansa ang maong mga solosyon aron dili usab maglisod ang mga negosyante, panawagan ni Moreno. Niini, ang konseho miduso sa ordinansa sa barangay Cugman ngadto sa komite sa labor and employment ni Konsehal Jose Pepe Abbu Jr. alang sa dugang pagtuon ug posibleng pagsukip sa sugyot ni Moreno.