Pascual nagpasalamat sa sponsors sa MissCdO swimsuit, evening gown competitions

ANG Search for Miss Cagayan de Oro maoy usa sa highlights sa Higalaay Festival 2024 nga nagpakita sa adbokasiya ug pagtambayayong sa matag barangay aron mapasundayag ang mga kwalipikadong batan-ong kababaehan nga nangandoy nga mamahimong beauty queen sa dakbayan.

Kini ang gibutyag ni Konsehal Jay Roa Pascual, Chairman sa Komite sa Turismo, atol sa swimsuit ug evening gown competitions niadtong Sabado diha sa SM Downtown.

Atol sa maong okasyon, si Konsehal Pascual nagpasalamat usab sa tanang sponsors ug mga opisyales sa barangay nga nahimong kabahin sa dakong kalamposan sa maong kalihokan.

Niini, si Konsehal Pascual nagpahalipay sa mga mananaog sa special award sa maong competition nga sila si Alyssa Marie Cordova sa Barangay Bugo nga nakasungkit sa siyam (9) ka special award:  Miss Blanche Skin, Miss Neuskin Aesthetic & Wellness Center, Miss Bigby’s, Miss Pepsi, Miss Infinity Smile, Miss McSmile by McDonald’s, Miss ParaFiber by Parasat, Miss Union Cement ug Miss Revival Salon and Spa.

Samtang si Gabriella Gil Cristi Alaba sa Barangay Bayabas nakasungkit sa tulo (3) ka special awards, Most Confident Award by Dr Wong’s Lightening System, The Face of Le Rouge ug Miss All Top; Jorea Jane Asilo sa Barangay 3 ang Miss Kotex ug si Queen Marie Tagaylo  sa Barangay Macasandig nga nakasungkit sa Miss Nature’s Spring.