Pascual misugyot nga lakip kadalanan sa kabukiran masusi

KUSGANONG gihangyo ni Konsehal Jay Roa Pascual, chairman sa komite sa Agriculture sa konseho, nga lakip nga masusi sa mga hingtundang ahensya sa gobyerno pinaagi sa City Engineering Office (CEO) ug sa Department of Public Works and Highways (DPWH) ang mga kadalanan sa kabukirang barangay nga diin nakasinati sa mga pagdahili sa yuta tungod sa milabayng mga bagyo.

Kini ang sugyot ni Pascual agig reaksyon sa special report ni Konsehal Edna Dahino atol sa sesyon niadtong Lunes nga gidumala ni Bise Mayor Kikang Uy mahitungod sa sugyot pagsusi sa mga tulay sa syudad aron maseguro nga wala kini maapektuhi sa nanlabayng mga bagyo nga mihapak sa nasod.

Dugang niini, boot usab sa konsehal nga maseguro nga lig-on pa ang pundasyon sa mga tulay labina nga daghan niini nga dugay nang natukod.

Sa laing bahin, gihangyo usab ni Konsehal Pascual nga ilakip sa maong inspection ang mga dapit nga adunay nahitabong pagdahili sa yuta nga nakaapekto sa kadalanan sa kabukiran alang sa kaluwasan sa tanan.