Pascual misugyot masukip desinyo sa rainwater facility sa kabalayan

DAKO kaayo ang tabang sa panginahanglanon sa tubig ang pagbutang og rainwater collection facility dinha sa matag panimalay ug uban pang edifisyo.

Mao kini ang panahom ni Konsehal Jay Pascual sa panawagan ni Konsehal Ian Mark Nacaya nga mahimoan og desinyo ang rain water collection facility agig pangandam sa panahon sa hulaw. Sa sesyon niadtong Lunes nga gidumala ni Bise Mayor Bebot Rodriguez, si Pascual mibutyag nga ang mga molopyo sa bukid adunay mga rainwater collection facility gamit ang kawayan ug barrel.

Matod niya nga dako kaayong tabang sa mga molopyo tungod kay ang nakolektang tubig gikan sa ulan mao nay magamit sa pagbunyag sa mga tanom, paglimpyo sa panimalay, panghugas ug uban pa apan dili gayud mainom.

Niini, siya miaghat nga kun mahimo masukip sa OBO ang desinyo sa rainwater collection facility alang sa mga bag-ong aplikasyon sa building permits.