Partnership pact tali’s CDO, MisOr alang sa pagpatuman sa foreshore management plan giuyonan

HAYAN mahatagan pa sa dugang kalamboan ug kaarangan ang mga baybayon sa dakbayan sa Cagayan de Oro ug probinsiya sa Misamis Oriental.

Kini human ang Konseho sa Syudad, sa sesyon kagahapon nga gidumala ni Bise Mayor Bebot Rodriguez, mipalabang sa ordinansa nga naghatag og panugot ni Mayor Klarex Uy pagpirma sa Memorandum of Partnership Agreement (MOPA) tali sa kagamhanan  sa probinsiya sa Misamis Oriental  ubos ni Gobernador Peter Unabia ug sa rehiyonal nga buhatan sa Department of Environment and Natural Resources  (DENR-10)  mahitungod sa implementasyon sa Foreshore Management  and Development Plan (FMDP).

Kini nga kasabotan magsilbing gambalay diha sa pagdumala ug pagpalambo sa rekurso sa lapyahan sa dakbayan ug Misamis Oriental.

Sa kasabotan, ang tulo ka partido magtambayayong dinha sa paghan-ay ug pagpatuman sa mamugna nga plano sa pag-amuma ug pag-atiman sa kabaybayonan  sumala  sa nahilatid sa FMDP.